係時候update下自己份保單了

連月來因受特衰政府洗腦式推銷嘅自願醫保影響，最近我都重新審視下我d「遠古級」燕梳(唔叫保險叫燕梳, 係咪好浪漫呢)。

果然我份「遠古級」燕梳就如前特首董伯伯當年嘅八萬五一樣已經唔存在喇(即是解:絕版了) ，所以我决定將原有的遠古級危疾抽出(史前嘢,年紀越大,供款會增加,會越供越興奮,增加爆血管風險), 新供一份現代版危疾，當然受保範圍比舊保單多好多好多好多，雖然保費略高(因我差不多到耆英級數及新保單有儲蓄成份) ，但仍可接受，而我新嘅「A盡時」亦都好努力去配合我呢位Cheap客，所以我都要多謝佢一聲。而「綠M」嘅promo禮物我就抽中咗$300 C9劵 & 預繳$1,700換隻apple watch 3。 點解係預繳?其實有隻Fitbit係Free,但如揀apple，只要頭2年平均每日最少行10,000步, 咁「綠M」就會分2年退返$1500俾你(即$750/年) ，另外每年步行若達標,來年保費就會有折扣，為咗慳呢筆$,我一定會努力運動。

加供939 建設銀行 & 2中電

今個月月供金額多咗少少,見939建設銀行個價有下調跡象所以今個月開始加供半年。(另有一注上年$ 7.08買入, 連手續費均價@$ 7.22, 唔知幾時先返到家鄉。)另亦加供埋2號仔中電，雖然昨日出咗盈警，澳洲零售業務商譽進行減值, 有可能影響派息,但無損我對佢嘅信心, 妨且用月供方式去儲股其實都已幫我分散咗d風險。

6月份中銀月供入嘅貴貨

00002中電控股     買入 55股   $90.3

00003香港中華煤氣 買入 376股  $17.22

00011恒生銀行     買入   4股  $202

00012恒基地產     買入 167股  $41.75

00066港鐵公司     買入  61股  $48.75

00823領展房產基金 買入  50股  $99   

00939建設銀行     買入  627股 $6.36

5/2019 中銀月供

00003香港中華煤氣 買入 423股 $18.86

00011恒生銀行     買入   4股 $201.8

00012恒基地產     買入 210股 $47.45

00066港鐵公司     買入  43股 $46.25

00823領展房產基金 買入  26股 $94.95   

由於3、12將會派發紅股(十送一呢個財技問題一直為好多人津津樂道) 所以比平時供多咗少少,望攞靚少少個平均價。

由於可愛嘅「侵侵」又出招, 令股市又下行到271xx點，所以下個月嘅供款金額有機會再次作用調動,或加供多1、2隻股(雖我資金有限)。

月供股票一週年

不經不覺筆者進行月供股票已有1年時間，投資戶口由當初的$0變為今天漸見氣色，實在令人感動又鼓舞(學子華神話齋一定係鬼上身) 。

「窮人多嗜好，網購點少得！」其實早在進行月供股票前，筆者為了戒除胡亂/重覆消費的惡習，已好忍耐地完成了一份18個月的零存整付，利息雖少，但總比只想不動(身邊有太多呢類型朋友)為優吧。

當然除了資產增值外, 個人增值亦少不得。正所謂「少壯不努力，老大徒傷悲」、「書到用時方恨少」，筆者在這方面有深切體會(又到講古時間)。

小時候讀書成積不佳，小一已被留級，在母親大人苦苦哀求校長及班主任下，校方最終勉強給我升上小二，而母親大人亦特地花$為我請來補習老師，望我成積會有進步，可惜筆者天生「懶過條蛇」嘅獨特氣質(氣質?!)發揮得太過淋漓盡致，所以母親的如意算盤從未打响，當然呢個親手養植咗幾廿嘅惡果到咗今時今日終於要硬食。 為了可以增進自己嘅才華，近年不停花$去進修(本應唔使$讀,宜家就要自費，係咪犯賤),只望响步入耆英階段前能夠來個廢中大翻身，否則真係會後悔。

踏入月供股票第二年，希望我嘅資產增值之路繼續一帆風順，而我亦會一如以往用零存整付的方式去預留學費。

我的月供組合:

3 煤氣     

11 恆生     

12 恆基   

66 地鐵   

823 領展  

我的反省誌

叫得自己做「偽。中產」或「廢。中」顧名思義就係終日只顧「享受生活」，沒有好好管理自己，直至有日驚覺再咁落去終有一日「床頭金盡」，為免自己埋唔到尾，所以决心改變現有的洗$習慣(優化d就叫理財態度)，化負數為正數、積極重組個人資產並進行增值，望早日可過「真。中產」生活。

此blog主要係記錄一下年時漸高嘅筆者究竟有無响度深切反省。